'Isnatser' gidemalas

Duha ka gidudahang isnatser nga magsakayan og motorsiklo nga milabni og cellphone sa babaye naratol ug nabangga sa giparking nga taxi diha sa dalan Escario sa barangay Camputhaw ning dakbayan kagahapon sa buntag, usa kanila ang nadakpan.

Ang suspek giilang si Roldan Limotan, hingkod ang panuigon, residente sa Pit-os, Talamban ning dakbayan, samtang ang kauban niyang nakaikyas giilang si Danny Lopez nga taga Sacsac, Consolacion.

Ang biktima giilang si Juliet Sumaylo,18, lumad nga taga Dawis, Bohol kinsa kasamtangang nagpuyo sa dalan Bontores sa Basak ning dakbayan.

Sumala pa sa biktima sa pakighinabi sa Banat News naglakaw siya sa eskina J.Osmeña ug Escario dihang kalit nga gisakdapan ug gilabni sa motorsiklong kolor maroon ang iyang bag.

Ang biktima daling misiyagit og pangayo'g tabang nga nadunggan usab ni PO2 Richard Valencia nga nadestino sa Siquijor kinsa gikan pa sa CCPO ug padulong na pauli sa ilang balay sa Capitol Site.

Si Valencia daling migukod sa motor sa mga suspek padulong sa dalan Gorordo apan sa karatol sa duha misampak sila sa usa ka taxi nga giparking sa dalan.

Human malimbuwad, nagbuwag og dagan ang duha apan si Limotan nakuptan ni Valencia samtang si Lopez gipusil sa bitiis apan milayat sa tulay adto tugpa sa atop sa kabalayan sa ubos ug wala matino kun naigo ba kini.

Dali usab nga nakaikyas si Lopez kinsa gituohang naigo pagpusil ni Valencia, ang 8850 nga cellphone sa biktima lakip na ang wallet nga may P158.00 narekober usab.

Matud pang Chief Inspector Ambrocio Ibones nga piyansado sa kasong physical injuries si Limotan, ug duna pa kini natanggong nga tulo ka warrant of arrest tungod sa mga kasong pagpanglabni.