Duha ka FTPs naangol

Duha ka mga polis nga sakop sa augmentation force sa kapolisan sa dakbayan sa Lapulapu ang naangol sa demolisyon nga gihimo niadtong miaging Biyernes sa buntag sa barangay Mactan, dakbayan sa Lapulapu.

Nunot usab kini sa pagsikop sa mokabat 13 ka tawo nga sakop sa nagkadaiyang pundok sa urban poor nga misulay sa pagpakgang sa gipanggubang kabalayan sa daplin sa dalan sa maong lugar.

Ang biktima mao sila si PO1 Jockelyn Medina ug PO1 Archie Ramo, sakop sa augmentation force sa kapolisan sa maong dakbayan nga gidistino sa Police Regional Office (PRO-7) alang sa 12th Association of Southeast Asian Nation (Asean) Summit sa karong Disyembre.

Ang gipangulohan nila ni Rosita Blando ug Ronaldo Abe Sitoy, pulos hingkod ang panuigon mao ang mga urban poor nga gipangdakop sa kapolisan.

Matud pa ni PO2 Christian Perez nga gialigar sa maong pundok sa mga kabus nga ilegal ang gihimo sa kagamhanan sa pagpangguba sa kabalayan sa maong lugar nga maoy hinungdan nga ilang gibabagan.

Ang mga tawo nga miali sa mga sakop sa demolition team sa city hall kalit nanglabay og bato ug ang duha ka polis maoy lakip sa nangaigo.

Kini maoy kabahin sa pagpangandam sa umaabot ang Asean Summit nga maoy hinungdan sa pagpangguba sa mga kabalayan ug ilegal nga estraktura sa daplin sa dalan paingon sa Shangrila Hotel sa barangay Mactan.

Sumala ni PO2 Perez nga ang mga dinakpan kinsa gitanggong karon sa ilang selda pasakaan og kasong pagpamun-og ug pagsukol sa mga awtoridad ug kalapasan sa Republic Act 7610 kon Child Abuse tungod sa paggamit og mga bata.