Secret marshals ug FTPs nakadakop og isnatser ug 'tulisan'

Mga secret marshals nga gi-deploy sa Cebu City Police Office nakadakop og usa ka batan-ong kadudahang miangkas sa PUJ apan kalit lang usab nanaog uban ang usa pa ka lalaki diha sa Sitio Tabay sa barangay Carreta ning dakbayan.

Ang nadakpan giilang si Junrey Ponce, 24, nga taga barangay Canjulao dakbayan sa Lapulapu human kini makuhai og usa ka kutsilyong may gitas-ong pito ka pulgadas ug usa ka paketeng shabu.

Ang midakop sa suspek giilang sila si SPO1 Fernando Velarde, PO2 Romualdo Anana, PO2 Reynold Malazarte ug PO2 Witzel Berry nga mga sakop sa Waterfront police station.

Ang maong mga polis misakay sa usa ka rotang 10M nga PUJ nga padulong sa North Reclamation Area aron pagpaniid ug pagpakgang sa mga tulisang mobiktima sa mga pasaheruang sakyanan.

Sumala pa sa mga polis, ang suspek uban sa laing lalaking kauban niini misakay diha sa maong dapit ug naniid diha sa sulod apan kalit lang nangambak ug nanagan pasulod sa sitio Tabay.

Ang maong mga polis nga nakabantay sa duha daling mikanaog ug migukod kanila hinungdan sa pagkasakop kang Ponce apan ang kauban niining giila niyang Ritchie nakatago sa mga kabalayan.

Samtang usa ka isnatser usab ang nadakpan sa mga sakop sa Field Training Program trainees nga nadestino sa Parian Police Station diha sa dalan Colon.

Ang nadakpan giilang si Florito Casin, 24, taga Limkaking subdivision sa Banawa, Guadalupe ning dakbayan kinsa milabni sa cellphone ni Reyna Agodo, 18, taga Lawaan III sa dakbayan sa Talisay.

Ang nakadakop kaniya mao sila si PO1 Artchil Tero ug PO1 Michael Echavez nga sakop sa Region 9 ug gibutang isip FTP beat patrols sa dalan Junquera ug P. del Rosario ning dakbayan.

Niadtong duha na ka semana ang milabay gimando ni Chief Supt. Silverio Alarcio, ang direktor sa Police Regional Office 7 nga i-deploy ang mga secret marshals ug paggamit sa mga FTPs kontra krimen gumikan sa kadaghan na sa mga insidente sa pagpanulis sa PUJ sa dakbayan nga mikalas na og usa ka kinabuhi.