Cellphone nakaingon sa aksidente

Gumikan sa nahibiling cellphone sa gipamistahan, usa ang namatay samtang duha ang naangol sa aksidente dihang napasok sa motorsiklo ang mga biktima ngadto sa gikasugat nga bus diha sa kurbadahon nga bahin sa Nangka, Guadalupe, Carcar kagahapon sa buntag.

Ang namatay mao si Rolando Barbac, 30 anyos, taga Calubihan, Barili ug naangol ang angkas niining sila si Arnold Capareda Ersan ug Rolando Camay, hingkod ang panuigon, taga Bogo, Cebu.

Mitahan hinuon ang drayber sa maong bus nga may plakang GVL-919 nga giilang si Mario Canedo, 40 anyos, minyo nga taga Malolos, Barili kinsa padulong na sa dakbayan sa Sugbo.

Si SPO1 Joseph Quimod, imbestigador sa traffic section sa kapolisan sa nahisgotang lungsod sa pakighinabi sa Banat News nagkanayon nga gikan pang namista sa Dakit, Barili ang mga biktima ug padulong na pauli dihang nahinumduman ni Barbac nga nahibilin ang iyang cellphone ug midesider og balik sa agi.

Gikatahong pipila sa mga tawo nga nakasaksi miasoy nga nag-zigzag na ang dagan sa motorsiklo ug napasok kalit sa maong bus.

Gumikan sa kakusog sa pagbangga nalagpot ang duha ka mga angkas ug ang motorsiklo uban ni Barbac nga napasok sa ilawom sa bus ug nalatayan sa ligid hinungdan sa kamatayon niini.

Gidala sa Carcar District Hospital ang duha ka mga naangol, ug ang drayber sa maong bus nga pasaheroan mitahan usab ngadto kanila.