Gisaka'g gipatay

Patay ang usa ka tawo kinsa gisaka sa wala hiilhing mamumuno sa sulod sa panimalay ug gipusil sa sitio Mayapay, barangay Captain Claudio, dakbayan sa Toledo alas 8 pasado ang takna sa miaging gabii.

Ang biktima mao si Elmar Hinayaf, 29 anyos, ulitawo nga taga Media 11 sa nahisgotang dakbayan.

Napalgan ang biktima nga nagbuy-od sa sulod sa panimalay nga gipanag-iya ni Leonardo Wamilda nga nahimutang sa maong dapit.

Si PO3 Robelito Tadeque sa kapolisan sa nahisgotang dakbayan nga gikahinabi sa Banat News miingon nga nahibilin nga nagluto sa kusina ang biktima.

Matud pa ni PO3 Tadique nga sa pakisusi nga ilang gihimo ilang nasuta nga nakadagan pa ang biktima sa pagtago sa sulod sa lawak sa maong panimalay.

Gigukod pa kini sa wala hiilhing mamumuno ug gitiwasan sa pagpusil hangtod namatay.

Dugang pa ni Tadegue nga atol sa maong pagpamusil walay silingan nga nakakita gawas lamang sa mga boto sa armas nga ilang nabati.

Si PO3 Tadeque miingon ilang gihimo ang dugang imbestigasyon sanglit wala may dautang record ang biktima sa ilang dapit.