Tulisan dakpan sa checkpoint

Tulo ka suspetsado sa pagpanulis sa collector sa usa ka kooperatiba kinsa midagit sa habal-habal nga motorsiklo nga giluwanan niini ang nadakpan sa blocking force nga gihimo sa kapolisan sa lungsod sa Carcar.

Matud pa niya nga nahitabo ang pagpanulis niadtong Huwebes sa buntag sa sitio Pit-os sa barangay Lantawan sa nahisgotang lungsod.

Giila ang mga suspetsado nga sila si Samuel Aparece Melencion, 20, ulitawo, taga Panghagbon, Buenavista, Bohol, Mariolito Alsa Henarque, 46, minyo ug Ereberto Pangaro Yamomo, 23, ulitawo nga pulos taga Pit-os, Lantawan, San Fernando.

Ang tulo maoy suspetsado sa pagpanulis kang Ofara Suarez, 27 anyos, dalaga ug kolektor sa Lamac Multipurpose Cooperative sa Lamac, lungsod sa Pinamungahan.

Gimaneho ni Wendel Semilla, hingkod ang panuigon sa nahisgotang lungsod ang habal-habal nga motorsiklo nga giluwanan sa biktima kinsa nagrota sa pagkolekta sa ilang mga sakop sa kooperatiba sa silingang mga lungsod.

Dugang pa ni PO2 Belesco nagdagan gikan sa lungsod sa Carcar ang habal-habal nga giluwanan sa biktima ug paghidangat sa maong dapit sa San Fernando kalit lang nga gibabagan sa mga suspetsado nga nagtion og armas ug dungan ang pagdeklarar nga tulis.

Gikuha sa mga suspetsado ang shoulder bag sa biktima nga gisudlan og salapi nga P3,000, nokia cellphone nga 3610 ug misibat nga maoy gihimong get-away ang habal-habal.

Matud pa ni PO2 Belesco nga dihang nadawat nila ang maong panghitabo sa pagpanulis dali nilang giradyohan ang Carcar Police Station kinsa mitubag gilayon sa maong alarma.

Ang team sa kapolisan sa Carcar nga gilangkoban nila ni SPO1 Socrates Pamilagan, PO3 Antino Pabor ug PO3 Jerome Tanod-tanod maoy nakasikop sa tulo ka suspetsado dihang ilang nasigpatan sa sitio Awayan, Poblacion 3 sa nahisgotang lungsod ang yellow nga aura motorsiklo.