CCPO duna nay SRU, ISOT nga polis

Duna nay representante ang kapolisan sa Cebu Provincial Police Office nga mga bag-ong migradwar nga mga sakop sa Special Weapons and Tactics (SWAT) ug Internal Operations Team (ISOT) aron maoy motubag sa mga dagkong alarma nga mahitabo sa lalawigan sa Sugbo

Mokabat og 58 ka mga polis nga migradwar kagahapon didto gipahigayon sa Central Command nga gipaubos sa tulo ka bulan nga training niadtong bulan sa Hulyo 3 niining tuiga nga gitambongan ni Gobernador Gwendolyn Garcia ug bise Gobernador Gregorio Sanchez Jr. uban sa mga dagkong opisyal sa kapolisan ug mga mayor ug bise mayor sa probinsya sa Sugbo nga kaalyado sa politika nila ni Garcia ug Sanchez

Ang 58 ka mga polis gibahin kini sa duha ka team diin 42 ang sakop sa SWAT Team maoy mopresentar sa mga urban areas ug laing 16 ka polis sa ISOT adto magbase sa probinsiya.

Atol sa shooting exercise kagahapon mipakita ang 58 ka mga polis sa ilang kahanas pinaagi sa ilang nakat-onan sa training

Si Insp. Arthur Salida, sakop sa Special Action Force ug training director nga nahinabi sa Banat News kagahapon miingon nga ang 42 ka mga sakop sa SWAT idestino sa mga urban areas nga maoy maniid sa kalihukan sa mga terorista samtang, ang 16 niini magbase sa bukid.

Si Garcia sa iyang pakigpulong miingon nga kinahanglang lig-on ug andam kanunay ang mga polis sa Sugbo.

Mokabat sa P2 milyones ang gigahin sa kagamhanan sa probinsiya lakip na sa ilang mga uniporme ug armas.

Naglakip sa mitambong mao sila si Centcom Commander Major Gen. Cardoso Luna, Provincial Director Sr. Supt. Vicente Loot, Deputy for Operation Sr. Supt. Hernan Lungayan, Deputy Director for Administration sa Police Regional Office 7 Sr. Supt. Ronald Roderos.