Dunay 14 ka mga magtutudlo sa nahisgutang tunghaan ang nabalaka sa pundo ug gidapatan sa kuwarta nga giamot sa mga tinun-an isip bayranan sa Parents Teacher Community Association tungod kay walay liquidation report ang teacher in charge sa PTCA
Giakusahan sa nagpakabanang maestro ug maestra sa nahisgutang tulunghaan ang usa ka magtutudlo nga opisyal sa PTCA (ngan gipugngan sa Banat News) nga walay insaktong dukomento sa napadulngan sa kuwarta sukad pa niadtong tuig 2001.
Usa usab sa ilang reklamo mao nga igo lang sila giingnan niini nga nawagtang ang records sa PTCA nga unta wala man masunog ang ilang tunghaan
Ang mga magtutudlo nga dili gustong magpahingan mitug-an nga makalolooy kaayo ang mga ginikanan sa mga bata tungod nga nagbalik-balik lang kini og amot nga walay insaktong pag-dukomento ang maong opisyal.
Matud pa nga dili ilista sa opisyal ang ngalan sa mga bata nga nakabayad na sa amotan ug paamoton hinuon og balik.
Tungod niini buot sa mga magtutudlo nga ipaabot ang ilang reklamo ngadto sa Ombudsman Visayas tungod kay giingong walay aksiyon ang Department of Education sa ilang unang reklamo nga giduso niadto pang bulan sa Marso niining tuiga.
Si Dep-Ed Provincial Director, Dr. Recaredo Borgonia misaad na hinuon nga iyang ipasusi ang giingong anomaliya sa PTCA.