Katakus sa PNP way ayo - Mike

Wala nay pagsalig ang ubang mga opisyal sa siyudad sa Sugbo kabahin sa katakus sa kapolisan pagsumpo sa lainlaing krimen nga mitumaw karon dinhi sa dakbayan.

Si Bise Mayor Michael Rama, tsirman sa Police Coordinating and Advisory Council (PCAC) mibutyag nga wala na siya malipay niining sunodsunod nga patay dinhi sa dakbayan nga kanunay nga dili gyud masikop ang mga kriminal.

Alang sa bise mayor gikinahanglan na gyud nga usbon ang pamaagi nga gisagop sa kapolisan.

Niadtong miaging gabii, laing tulo ka estudyante nga sila si Earl Rodriquez Lumaing, 23, Miles Oliver Ortiz,16 ug Millard Monte de Ramos,utility worker sa Bureau of Customs gipamusil patay diha sa gawas sa ilang boarding house sa may Ybarra St., barangay Pari-an nga dili layo sa Pari-an Police Station.

Nanawagan ang bise mayor ngadto sa kumunidad nga magpakabana pagsumbong sa kapolisan kun duna kini nahibaw-an nga mga tawong responsable sa krimen.

Apil sa giawhag ang mga opisyal sa kabarangayan nga mohimo og subsob nga pakisusi kun kontrolado pa ba niini ang sitwasyon sa kahusay ug kalinaw diha sa ilang tagsatagsa ka hurisdiksyon.

Niadtong miaging semana, usa ka 19 anyos nga si Carmela Cabañog, tinun-an sa kolehiyo nga taga Ginatilan, Cebu gipusil patay sa nag-inusarang tulisan sa Tagonol, Pardo human nagmagahi paghatag sa iyang bag nga dunay sulod nga cellphone ug dili pa lang dugay usa ka manager sa bangko nga si Narciso Damole gitulis usab ug gipatay sa may North Reclamation Area sa Mandaue. - Darrel A. Carumba Saksi pagpatay sa bank manager i-polygraph test sa NBI-7 Ni Bong Soriano

Saksi sa pagpusil patay sa manager sa Allied Bank sa Mandaue gidala sa buhatan sa National Bureau of Investigation (NBI-7) alang sa usa ka polygraph test kagahapon sa buntag.

Kini ang giluwatang pamahayag ni Insp. Ramon Villar, deputy chief sa Intelligence Section sa Mandaue City Police Office atol sa pakighinabi sa Banat News.

Matud pa ni Villar aron matino kun unsa ka tinuod ang mga pamahayag sa saksi ila kining gipaubos sa polygraph test ngadto sa NBI-7 ug isunod niini ang lain pang saksi.

Hangtod karon giangkon ni Villar nga hanap pa gihapon ang ilang imbestigasyon sa pagtumbok sa mipusil patay ni Narciso Damole kun basehan lamang ang mga pamahayag sa ilang duha ka saksi.

Hinuon padayon pa ang ilang paghupohupo sa posibleng kasulbaran sa maong kaso ug nagpasalamat sila nga walay pressure nga gihatag ngadto kanila sa kadagkuan sa kagamhanang lokal sa Mandaue.

Samtang si Mandaue City Mayor Thadeo Ouano nagpasalamat sa mga sakop sa NBI-7 sa pag-apil nila sa pagsulbad sa maong kaso.

Matud pa ni Ouano mas maayo kun daghan ang mohimo og lakang sa pagsulbad sa maong krimen aron kahatagan og hustisya ang pamilya sa biktima.

Subay niini, mitanyag usab si Ouano nga andam usab siya sa paghatag og mando ngadto sa kapolisan sa dakbayan sa Mandaue sa pagsikop sa vigilantes kun manghangyo og tabang ang mga sakop sa kapolisan sa dakbayan sa Sugbo ngadto kanila sama sa pagtabang sa NBI-7 nga gikan sa mga pamahayag ni Bise Mayor Michael Rama nga kinahanglan nga adunay laing unit nga posibleng makatabang sa pagsulbad sa kamatayon ni Damole. - Bong Soriano