Sugbuak bill dili palihukon sa Rules

Dili palihukon sa House Committee on Rules ang mga balaudnon nga gitawag og Sugbuak Bills.

Kini hangtud nga dili maresolbar sa House Committee on Local Government nga gipanguluhan ni Kong. Emilio Macias III ang motion for reconsideration sa pag-aprobar sa komitiba sa nahisgutang mga balaudnon.

Usa ka suwat pinitsahan og Septiyembre 27, 2006 nga gipirmahan nilang Kong. Antonio Cuenco, Kong. Raul del Mar, Kong. Ramon Durano VI ug Kong. Eduardo Gullas samtang dunay pangalan ni Kong. Jesus Crispin Remulla apan walay pirma ang gipadangat ngadto kang Majority Leader Prospero Nograles.

Si Nograles kinsa maoy chairman sa House Committee on Rules gipahibawo sa nahisgutang mga kongresista sa kapakyas sa komitiba ni Macias sa pagresolbar sa ilang giduso nga mosyon atol sa tigum niadtong Miyerkules.

Ang pag-insister ni Macias nga wala na'y hurisdiksiyon ang iyang komitiba sa pagresolbar sa mosyon ang pabilo sa lalis nilang Cuenco nga hapit moresulta sa pagdinapatay atol sa tigum didto sa kauluhan.

Nunot niini, gihangyo ni Cuenco ug kaubanan si Nograles nga dili aksiyonan ang report sa komitiba ni Macias hangtud dili maresolbar ang mosyon.

Nasayran nga ang komitiba ni Nograles niaprobar usab sa report ni Macias ug gani gilakip na sa calendar of business sa plenary ang tulo ka balaudnon nilang Kong. Simeon Kintanar, Kong. Antonio Yapha Jr. ug Kong. Clavel Asas Martinez.

Tinguha ni Cuenco ug kaubanan nga mabalik sa komitiba ni Macias ang mga balaudnon gumikan sa ilang giduso nga mosyon.