Kolektor sa 'wala' padayong gigukod

Gipasalig sa militar nga may madakpan na usab silang "tong" collector sa mga rebelde sa dili madugay samtang gisundan nila pag-ayo kining lihok karon sa mga New People's Army (NPA) nga pagpangilkil.

Si Col. Oscar Lasangue, hepe sa Civil Relations Group (CRG) sa Central Command mitino nga may isunod silang dakpon human nila ni Gerald Labadia ug Sharon Abangan kinsa nadakpan "infragrante delikto" samtang midawat sa ilang kinilkil nga salapi gikan sa biktimang negosyante sa usa ka merkado sa Tabunok Talisay City niadtong miaging buwan.

Hinuon wala ibutyag ni Lasangue kun pila ka tawo kining hugot nga gipanid-an karon sa ilang intelligence group kansang kalihokan mao ang pagpangolekta sa buhis nga gisingil nila gikan sa mga negosyante ug mag-uuma dinhi sa Sugbo.

Gani matud pa ni Lasangue nga human mokompisal kanila ang 18 ka mga negosyante kinsa biktima na sa pangilkil sa NPA, napun-an na usab kinig sobrang napulo ka negosyante dinhi sa Sugbo nga wa na mahadlok pagtug-an sa kasinatian nila sa pangilkil nga gihimo sa NPA kanila.

Miingon si Lasangue nga nasayran nilang naa pa gyuy daghan nga mga negosyante dinhi sa Sugbo nga gidaog pa sa ilang kahadlok busa nangita pag higayon aron ikabutyag nila ngadto sa militar ang ilang pag-sakripisyo paghatag og suborno ngadto sa NPA.