13 ka NPA gipatay sa kauban kuykoyon pa

Duna pay 13 ka mga miyembro sa New People's Army (NPA) nga biktima sa ilang "purging" kun pamung-ol ang kawtonon dinhi sa Sugbo.

Kini ang gibutyag ni Col. Oscar Lasangue, hepe sa Civil Relations Group sa Central Command kinsa nagkanayon nga hangtod sa pagkakaron unom pa ka mga NPA nga giunay pagpatay sa ilang mga kauban ang nakuykoyan dinhi sa lalawigan.

Matud pa ni Lasangue nga ang labing bag-ong nakawtan mao ang magtiayong Herculiano Laguna ug Luz Añasco Laguna kinsa nakawtan sa usa ka gilubngan niini didto sa barangay Bonbon, ning dakbayan sa Sugbo niadtong unang semana ning buwan sa Septiyembre.

Nasuta dihang giawtopsihan ni Dr. Gerome Baylen, forensic expert sa University of the Philippines (UP) nga nag-agi og paantos una pamatya ang magtiayon niadtong 1984.

Ang naggiya kang Baylen nganha sa Bonbon mao ang igsuon sa magtiayon kinsa wala na kaantos sa kasakit nga iyang gibati sa nahitabo sa mga biktima.

Matud pa ni Lasangue nga gipatay ang mga biktima kay gidudahan sa ilang dakodako sa NPA nga mga "deep penetration agent" (DPA) ug tighungit og balita ngadto sa militar.

Sa pagkakaron miingon si Lasangue nga unom na ka mga sakop sa NPA kinsa giunay pag-ihaw kabahin ning ilang programa sa pagpamung-ol.

Sumala sa rekord sa militar may 19 ka dagkog ranggo sa NPA dinhi sa Sugbo nga giunay ra pagpatay sa ilang mga kaubanan gumikan sa katahap nga nakig-abin kini sa militar.

Busa tungod kay napalgan na ang unom, 13 nalay nahibilin ug kini ang pangitaonon pa matud ni Lasangue.

Ang unang upat ka mga biktima sa "purging" napalgan niadtong miaging buwan sa usa sa mga lungsod ning lalawigan, matud pa ni Lasangue.