Lalaki miambak sa flyover

Kritikal ang kondisyon sa usa ka 20-anyos nga lalaki human kini miambak gikan sa flyover sa Tabunok niadtong Martes sa gabii.

Nawagtangan sa panimuot ug nakaangkon og bali sa kabukogan si Donato Quevedo taga dalan Cabreros, Barangay Mambaling niining dakbayan pagtugpa niini diha sa aspaltadong karsada sa lugar ug migawas ang dugo sa ilong ug baba niini.

Si Quevedo daling gidala sa mga polis sa Talisay District Hospital apan tungod sa kahimtang niini gibalhin diha sa Vicente Sotto Memorial Medical Center.

Base sa imbestigasyon sa kapolisan sa Talisay pinangulohan ni Insp. Rolly Lauron nga si Quevedo wala sa iyang saktong panghuna-huna tungod kay nag-antos kini sa nervous breakdown.

Sa wala pa maabot diha sa Tabunok si Quevedo una kining misuway og ambak gikan sa atop sa ilang balay apan napugngan.

Sa maong insidente midagan si Quevedo nga walay tumong ug wala na masundi sa iyang mga paryente ang gipadulngan niini.

Ang mga polis na maoy mipahibawo sa mga ginikanan ni Quevedo kabahin sa paglayat niini sa fly-over.