Tomas ug mga higala mohatag og hinabang

Mokabat sa P15 mil nga hinabang pinansiyal gipasalig sa siyudad sa Sugbo nga ihatag ngadto sa pamilya sa 19 anyos nga tinun-an sa kolehiyo dinhi sa dakbayan nga gipusil patay sa suspetsadong tulisan didto sa Highway Tagunol.

Gibutyag ni Mayor Tomas Osmeña atol sa press conference kagahapon sa udto nga ang P5 mil naggikan kini sa regular nga cash assistance sa City Hall.

Samtang ang laing P10 mil personal kini nga kwarta sa mayor ug tampotampo gikan sa iyang mga suod nga higala isip ihinabang ngadto kang Carmela Cabañog, lumad nga taga lungsod sa Ginatilan.

Una nang gipasabot ni Osmeña nga iyang gihatagan og exemption ang biktima aron makapahimulos sa cash assistance nga P5 mil tungod nagtungha kini sa unibersidad dinhi sa dakbayan.

Ang biktima napusilan patay sa suspetsadong tulisan dihang nisukol kini og nagmagahi paghatag sa iyang bag nga dunay sulod nga cellphone.