Polis nga way college kutob '07

Gisubli sa National Police Commission (NAPOLCOM) ang ilang warning nga kutob nalang sa 2007 ang serbisyo sa mga polis kinsa wala makahuman og upat ka tuig nga kurso sa kolehiyo.

Ang maong pasidaan gipalanog ni Legal Officer Zandro Orio sa Napolcom-7 kinsa nagkanayon nga taas na kaayo ang lugway nga gihatag sa gobyerno ngadto sa mga polis nga undergraduate.

Gitug-an ni Orio nga base sa balaod, ang usa ka polis makaserbisyo lamang sa pamolis kun gradwado kini og kurso sa kolehiyo.

Gani sa eksaminasyon nga gitakda sa Napolcom karong umaabot nga Nobiyembre ning tuiga, kadtong wala pa kahuman sa kolehiyo basta pasado na sa 72 ka units niini, pwede nang mointra sa eksamin, apan kun makapasar siya unya na siya makasulod pagka-polis kun makahuman na siya sa kurso sa kolehiyo.

Apan kun may mga polis nga nagpabilin hangtod karon sa katungdanan bisan kun undergraduate sila, si Orio miingon nga daan na silang diha sa serbisyo pagpatuman sa balaod nga naghigpit sa naabot nga edukasyon sa usa ka polis.