Matud pa ni Andy Berami, ang operations officer sa Nerve Center ug miyembro sa Task Force Neptune on Coastal Law Enforcement sa dakbayan sa Lapu-Lapu nga mga alas 8:43 kagahapon sa buntag nakadawat siya og text message gikan ni Boy Amores, chairman sa Ocean Care Advocate sa Lapu-Lapu ug nagpahibalo nga dunay oil slick sa Olango.
Kini ang hinungdan nga ila kining gisubay ug positibo sa oil slick ang naasoy'ng sitio sa Olango.
Gihulagway ni Berami nga moabot sa 50 ngadto sa 100 metros ang gilapdon sa maong oil slick diin napadpad gikan sa Camotes ug nagpundo kini sa Hilutongan channel gumikan sa kakusog sa sulog niini sa direksiyon sa hangin padulong sa amihanang Sugbo.
Gidudahan nga dunay barko o mga pumpboat nga mihuwad o milabay sa maong lana ngadto sa dagat samtang kini naglawig sa kadagatan sa Camotes sa milabay'ng gabii.
Gipaniguro usab ni Berami nga dili gikan sa Guimaras ang maong oil slick gumikan kay unang maalarma niini mao ang isla sa Bantayan ug Camotes.
Dilikado usab ang fish sanctuary sa Olango kun mobali ang hangin ngadto sa habagatang Sugbo ug mosulod ang oil slick sa Hilutungan channel.
Gumikan niini, magtagbo ang mga opisyal sa CFARMC alang sa dugang lakang nga ilang himuon aron masumpo ang maong pagsulod sa oil slick sa isla sa Mactan.
Matud pa ni Berami nga mikuha siya og sampol sa maong lana ug ila kining isumiter ngadto sa Philippine Coast Guard alang sa pag-analisar niini ug posibleng pagsusi kun kinsa ang responsableng sakyanan sa dagat nga milabay niini.