MCWD ok matag lungsod dunay suplay sa tubig

Dili supak ang taga Metropolitan Cebu Water District (MCWD) sa plano sa gobiyerno nga matag lungsod magtukod og kaugalingong suplay sa tubig nga dumalahon sa lokal nga kagamhanan.

Matud pa ni Terry Andaya, tigpamaba sa MCWD, nga bisan sa mga lungsod nga gisilbihan og tubig sa MCWD, motugot ra sila nga magtarok og kaugalingong suplay sa tubig ang mayor sa maong lugar.

Apan nasayod si Andaya nga maglisod pag-adjust ang lokal nga kagamhanan sa pagpasawom sa ilang presyo, sama sa MCWD nga presyo sa tubig.

Kini tungod kay sa kadaghang gisuplayan og tubig sa MCWD sa lungsod nga may franchise sila, nakaestablisar na sila og tukmang kahimanan sa dugay nang katuigan.

Busa ang presyo nila ubos kaayo kun itandi sa bag-o lang magtukod og mga kahimanan sa tubig diin duha ray dangatan sa maong kakompetensiya. "Kon dili maalkanse, mabangkarota," matud ni Andaya.

Sama sa nahitabo sa Toledo City Water District nga kaniadto gidumala sa lokal nga kagamhanan sa maong siyudad.

Apan sa dihang nabangkarota kini, gisawo sa MCWD ug sila nay nagpadagan niini, matud pa ni Andaya.

Ang MCWD nagmentinar sa iyang mga water district sa lungsod sa Carcar, Pinamungahan, Moalboal, Dalaguete, sa dapit sa habagatan ug Bogo ug Borbon sa amihanan.