Sayon nga paagi pagbayad sa buhis sa dakbayan gitinguha

Mga magbubuhis sa dakbayan sa Sugbo pwede na unyang makabayad sa ilang mga buhis over the counter kung maaprobahan ang gisugyot nga ordinansa ni Konsehal Augustus "Jun" Pe Jr.

Ang maong ordinansa gitawag nga "Alternative Mode of Payment Authorizing Ordinance" nga tumong sa pagpalig-on sa kapabilidad sa siyudad sa epektibong pagpahigayon sa nag-unang serbisyo ngadto sa publiko.

Ubos sa Akta Republika 8792 kun "Electronic Commerce Act sa 2000" ang kagamhanan miawhag sa paggamit og electronic data messages o electronic documents sa pagpahigayon sa commercial ug non-commercial nga mga transaksiyon.

Sa section 27 sa RA 8792 nimando sa ahensiya sa gobiyerno sa paggamit og electronic data message o electronic documents sa pag-isyu og permits, lisensiya og certificates of registration o approval, nag-required og pagdawat og bayad ug pag-isyu og resibo.

Si Pe nagkanayon nga ang maong pamaagi ug pagbaton og pasilidad nakahatag og benipisyo sa publiko.

Ubos sa gisugyot nga ordinansa, ang city treasurer gitugotan sa pagdawat isip alternatibong pamaagi sa mga bayad gikan sa mga magbubuhis gamit ang internet banking, ATM ug over the counter nga bayad.

Ang bangko kinahanglang adunay accreditation gikan sa buhatan sa Mayor una kini matugotan nga mopahigayon og serbisyo.

Kinahanglan nga adunay Memorandum of Agreement (MOA) tali sa bangko ug sa kagamhanan sa siyudad.