Mga doktor moabag atol sa ASEAN

Moabag ang mga doktor sa Sugbo sa umaabot 12th Association of Southeast Asian Nation (Asean) Summit karong Disyembre pinaagi sa pag-andam kanunay alang sa pagtubag sa dinaliang panginahanglan sa ilang serbisyo.

Kini ang pamahayag sa pangulo sa Philippine College of Surgeons (PCS) Visayas Chapter nga si Dr. Manuel Villamor.

Matud pa niya nga mokabat sa 15 ngadto sa 20 ka mga doktor sa Metro Cebu ang mahimong matawag kon gikinahanglan sa umaabot nga Asean Summit.

"We are very much ready in terms of availablity of personnel, should anything happen to the delegates, nagkanayon si Dr. Villamor sa iyang pamahayag.

Dugang pa niya makig-alayon ang ilang pundok sa Emergency Rescue Unit Foundation (ERUF), sa Cebu Medical Society ug sa Cebu College of Physicians ug uban pang pundok sa mga mananambal.

Kini ilang pagahimoon aron sa pagpakita usab sa mga langyaw nga delegado nga nakapangandam ang gobyerno alang sa pagsiguro sa panglawas sa mga delegado nga motambong sa kalihokan.

Matud pa ni Villamor nga dili lang ang pagtubag sa ordinaryong matang sa balatian ang angay nga pangandaman sa mga doktor kon dili lakip na ang pang-emerhensiyang panginahanglan.

Naglakip na niini ang pag-atiman sa mga biktima sa aksidente sa dalan, pagpamusil ug pagpamomba sa mga terorista.