Cebu Press Freedom Week pormal nga gitak-upan

Pormal na nga natapos niadtong Sabado sa gabii ang pagsaulog sa Cebu Press Freedom Week diin nabuksan kini niadtong petsa 17 niining buwana.

Ang programa sa pagtapos sa Press Freedom Week gipahigayon diha sa Laguna Garden sa Ayala Business Park ning dakbayan diin gipasadya sa comical skit contest ug media idol gikan sa nagkadaiyang beat reporters ug ingon man ang raffles.

Ang first, second ug third winner sa comical skit nakadawat og P5 mil, P3 mil ug P2 mil nga premyo ug P5 mil ang nadawat nga premyo sa napiling Media Idol.

Ang Defense PNP Press Corps maoy milangkat sa unang pwesto sa ilang presentasyon sa "Secret Marshals" pinaagi sa ilang maanindot ug makalingaw nga presentasyon, sunod ang Media Alliance for Law,Liberty, Equality and Truth (MALLET) ug Ikatulo ang Capitol Association of Reporters in Tri-Media (CART).

Si Malou Inocando-Tabar kinsa sakop sa CART nga mikanta og "Im Saving All My Love For You" maoy swerting napiling Media idol.

Ang Cebu Daily News maoy convenor niining tuiga sa gisaulog sa Cebu Press Freedom Week.

Sa pagsirado sa maong kasaulogan ang San Miguel Corporation maoy misalo sa selebrasyon.