Mabdos usa sa 3 ka gidakop

Usa ka miangkong shoplifter ug usa ka unom ka buwan nga mabdos maoy naapil sa gipangdakop atol sa gihimong ronda kontra drogas sa kapolisan diha sa Private sa barangay Sambag Uno ning dakbayan kagahapon sa kaadlawon.

Ang mabdos nga gidakop giilang si Jocelyn Bacho,21,taga Private, sitio Riverside ug ang miangkong shoplifter mao si Jennifer Dayono,27,taga Private sitio San Roque ug ang lalaki mao si Arestides Llamosa alyas Ares,35, taga sitio Laguna sa barangay Sambag Uno.

Ang ronda nga gipanguluhan ni Chief Inspector Henry Biñas uban sa mga Field Training Program ug mga tanod sa barangay pinasikad sa search warrant nga giluwatan ni Judge Simeon Dumdum Jr.sa Regional Trial Court, Branch 7.

Ang kapolisan nakasakmit kang Bacho og usa ka pitakang may sulod nga usa ka linikit nga marijuana, usa ka medium size nga pakete ug unom ka gagmay'ng paketeng pulos may sulod nga gidudahang shabu lakip na mga paketeng mga lama sa gituuhang shabu.

Samtang nakuhaan sab si Llamosa diha sa ilang balay og usa ka dakong plastik, tulo ka medium size nga pakete ug walo pa ka gagmay'ng paketeng pulos dunay sulod nga gidudahang shabu.

Nakuhaan usab si Llamosa og 13 ka mga linikit nga gagmay'ng foil, 27 ka mga wala nay sulod nga gagmay'ng pakete nga dunay nabiling lama sa gidudahang shabu ingon man mga drug paraphernalia.

Ang raiding team nakakuha usab og usa ka medium pack ug tulo ka gagmay'ng pakete nga pulos dunay sulod nga gituuhang shabu ingon man ang mga drug paraphernalia ug tulo ka buhing bala sa kalibre 45.

Si Dayono dihang gikahinabi sa Banat News kusganong mihimakak sa pasangil nga usa siya ka drug pusher ug dili iya ang maong mga ebidensya.

Matud pa niya nga dunay silingan nga naglagot kaniya nga dunay higalang polis ug maoy iyang gidudahang mitumo-tumo kaniya aron siya ipadakop.

Giangkon ni Dayono nga tiggamitan siya og drogas ug iya kadtong mga drug paraphernalia nga nakuha apan dili ang mga drogas nga giingong nasakmit gikan kaniya.

Dugang pa niya makaduha na siya madakpi tungod sa pagpangawat sulod sa mga department stores diha sa North Reclamation Area tungod kay wala na siya'y pangabuhian sukad namatay iyang inahan, apan pulos niya kini giareglo.

Samtang si Bacho nagkanayon nga wala siya malambigit sa drogas. Si Llamosa sa iyang bahin miangkon nga tiggamitan ingon man mamaligya usab og ginagmay nga drogas apan dili susama kadaghan sa giingong nasakmit kaniya sa mga polis kagahapon.