Kawatan gibukbok sa mga tawo

Nabukbokan sa mga tawong nagbitbit og tubo ang usa ka gidudahang kawatan human kini misuway og kawat sa usa ka compressor diha sa usa ka tindahan sa mga antigong butang sa dalan Governor Cuenco sa barangay Banilad ning dakbayan kagahapon sa buntag.

Ang suspek nga naghubag ang simod nga nadangat sa Mabolo police station giilang si Raymund Sombihon, 19, taga sitio Lusimba, Pardo ning dakbayan.

Ang biktima nga nabalaw og gukod kaniya giilang si Paquito Soquib Jr., 30, residente sa dalan Cabantan sa barangay Luz ning dakbayan ug empleyado sa Treveños Art and Antiques sa Banilad.

Sa imbestigasyon ni SPO3 Reolito Jacalan mitumaw nga nangandam na si Soquib sa iyang pagpanglimpyo sa mga antigong butang ug gibutang niini ang compressor nga nagkantidad og P5,200 diha sa gawas.

Apan sa pagbalik niini nawagtang kini sa gibutangan hinungdan nga nagpangutana siya sa mga kasikbit ug gitug-anan siyang giaswat kini sa usa ka lalaki ug misakay og 13B nga rota sa PUJ padulong sa dakbayan.

Si Soquib daling migukod sa maong PUJ hangtud nga naabtan kini diha sa dalan Gorordo diin nakit-ang miambak si Sombihon ug gigukod sa mga tawong nagbitbit og tubo.

Diha na masakpi si Sombihon human mabulasot sa usa ka kanal ug gitabangan og kulata sa mga tawo, usa ka traffic enforcer nga nadestino isip parking attendant nga si Jimmy Lariosa maoy mipakgang sa mga tawo ug gidakop si Sombihon.

Si Sombihon dihang gipangutana sa Banat News mitug-an nga duna kini utang sa manggahan nga P1,500 ug gipaninglan na siya niini.Ang compressor narekober diha na sa maong PUJ.