KDP-Lapu misaway sa P10M para Asean

Mga miyembro sa Kilusan Para sa Pambansang Demokrasya (KDP) sa siyudad sa Lapu-Lapu mi-martsa sa Fernan Bridge padulong sa City Hall ug gikuwestiyon nila ang kabahin sa pagpagawas sa P10 milyones nga calamity fund sa siyudad sa Lapu-Lapu kagahapon sa hapon.

Daghan na ang hulga sa demolisyon dinhi sa siyudad sa Sugbo nunot sa nagkaduol nga ASEAN Summit nga pagahimuon dinhi karong umaabot Disyembre.

Mipahayag si Rosita Blando, ang tigpamaba sa KDP-Lapu-Lapu ug lider sa KAISAKA organization nga ang konseho sa siyudad sa Lapu-Lapu dali lang nakapalusot og resolusyon alang sa pag-aprobar sa P10 milyones calamity fund statutory Reserve.

Matud pa ang calamity fund nga ilang giaprobahan gamiton kun naay disgrasya nga mahitabo sa nagsingabot nga summit.

Si Blando nasagmuyo sa iyang nahibaw-an tungod kay dali lang sa konseho ang pag-aprobar sa resolusyon nga igasto ngadto sa pagpangandam sa ASEAN, apan walay aksyon nga gihimo ang gobyerno kalabot sa mga naigo sa demolisyon sa Sitio Mangal, Punta Engaño.