Eksamin sa Bar

Taym sa. Dili bar nga suroyanan magabii ang akong ipasabot dinhi. Kay dili na kinahanglan ang eksamin o pasulit diha. Dili sab bar nga sabon akong buot tukion karon. Kay sa kontes sa sabong panglaba, hangtod karon wa pa gyuy nagdaog. Kining pasulit aron mahimong abogado ang atong hisgotan karon. Kay didto sa Manila , sulod sa upat ka Domingo niining bulan sa Septiyembre, ang atong mga abogadohon, nga usahay atong tawgon og mga MA (Morag Abogado), tua karon didto nagwadwad aron pagkuha sa maong pasulit.

Giila nga pinakalisud nga pasulit ang Bar Exam. Ma tinuod man kini o dili, nagpabilin nga usa ka dakong hagit sa mga tinun-an sa balaod ang maong pasulit. Gani, ang mga tinun-an dili naman magtuon aron nga mopasar lang sa mga peryodikal nila nga pasulit, kondili isip usab pangandam sa Bar Exam.

Gidungog nga adunay uban nga medyo molikoy og gamay ang pamensar tungod sa maong eksamin. Tingali tungod sa pressure, o sa kadaghang gihunahuna. Mao bitaw nga ang akong pirmi itambag sa akong mga tinun-an nga mokuha sa maong pasulit: ayaw intawon pa-pasmo-pasmo sa kaon. Ug ayaw usab painit og maayo o paulan.

Niadto kos Manila niadtong miaging Sabado ug Domingo aron mohatag sa akong moral support sa akong mga estudyante nga mikuha sa pasulit sa Bar. Sa akong duha ka adlaw nga pakig-unong kanila, ako naman hinoon ang gihilantan. Naunay hinoon kos akong tambag da. Maayo nalang wa koy labot sa maong pasulit.

Didto sa gawas sa La Salle University diin gihimo ang eksamin, naglaray ang mga tulda, mga lamesa ug lingkoranan sa nagka-lain lain nga mga eskuylahan sa abogasiya sa tibuok Pilipinas. Nagkada-iya ang mga banners. Dili paalkanse ang mga Bisdak. Tua didto sa sentro gyud ang mga kampo sa mga taga Cebu . Dihay mga taga lagyo, sama sa Cordillera, nagdala sila sa ilang mga school bus ug didto na tingali to mangatulog ang mga supporters sa ilang sakyanan. Mao ni klase sa pista nga adunay representante kada rehiyon sa Pilipinas, ug klase-klaseng sinultihan ug kultura, sa usa lamang ka lugar. Ang mga kan-anan sa duol, ug mga hotel, fully booked. Ang uban gipakyaw na aron way laing mosulod.

Kada dunay mogawas gikan sa La Salle , sugaton dayon sa mga supporters, tagaan ug pagkaon kon ting-paniudto, o dili ba mainom kon hapon na. Duna say mogawas nga magyawyaw, magsyagit syagit nga morag nalisuan sa tornilyo kon hilabihan ka lisud ang eksamin. Alam-alaman kini sila sa mga supporters, kinsa andam mag-yaya sa mga examinees. Ang dili madalag alam-alam, usahay makasakay gyud og ambulansya. Apan dili buot ipasabot nga buang ni sila, bisan mao kini ang kasagaran nga madunggan nato inig maghisgot-hisgot sa maong pasulit samtang nagtagay. Kini usa lang ka phenomenon sa mga mokuha sa among pasulit, nga maoy naka-unique sa Bar, ingon tang punga. Paagi lang kini pag-release o pagpagawas sa pressure. Dili lalim mag-abogado uy.

Kon alegre ang una, ikaduha ug ikatulo nga Domingo, mas labaw pa unya ka alegre ang ika-upat nga Domingo, nga mao ang katapusang adlaw sa eksamin. Dili na maagian sa sakyanan ang Taft Avenue duol sa La Salle . Lupig pay pista. Magbaha ang beer. Didto sa kampo sa mga estudyanteng kwartahan, champagne sad ang magbaha didto. Ang mga eskuylahan magdala sa ilang mga drum and bugle corps, mga dance troupe. Sa niaging tuig, nag-Sinulog ang taga Southwestern University . Diha sad toy tuig nga ang taga UP nag Oblation Run, kanang managan sa dalan nga walay sapot, makita tanang bahandi. Alang sa uban nga bag-o palang naibtan sa tunok nga mao ang upat ka Domingo nga eksamin sa Bar, nahimong simbolo ang Oblation sa kagawasan sa pagpuwaw og tuon ug pagpaulipon sa libro. Tingali dili kini ang tukma nga kahulugan sa Oblation, apan mao kini ang psychological nga kahulugan alang niadtong mga bag-o pa lang mikuha sa maong pasulit.

Nahimo na nga tradisyon ang pagpulaw sa mga supporters alang sa mga mokuha sa pasulit. Kining morag pista sa Taft Avenue kada Domingo sa Septiyembre daw sa nahimo na sang tradisyon. Ug kay eleksyon man sunod tuig, dili na lang ko mahibulong kon adunay mga kandidatohon pagka-senador nga magpakita sa bar site karong Domingoha. Mas ok pa gyud tingali kon moapil sab sila sa Oblation Run.

Alang sa inyong mga reaksyon ug panahom, palihug e-mail sa [email protected] o text sa 0915-5536986. Daghang salamat.