Kini ang nasayran sa Banat News kang PO2 Romil Lim sa intelligence and investigation section sa follow up nga gihimo kagahapon.
Matud pa niya nga nagpadayon ang follow up nga ilang gihimo sa paghipos og dugang kasayuran alang sa dinaliang kasulbaran sa kamatayon sa biktima.
Si Police Regional Office-7 Director Chief Supt. Silverio Alarcio Jr., kinsa mimando sa dinaliang kasulbaran mibisita kagahapon ni Mandaue City Police Office Director Sr. Supt. Eduardo Catabas paghimo og subsob nga imbestigasyon sa hitabo.
Naglakip niini ang pagdestino og pagpatrolya sa kapolisan sa 24 oras sa reclamation area diin usab mahimutang ang nagpadayong giugmad nga Cebu International Convention Center (CICC) nga maoy venue sa umaabot nga 12th Asean Summit karong Disyembre.
Ang chairperson sa Regional Peace and Order Council (RPOC-7) nga si Gobernador Gwendolyn Garcia miingon nga ang pagdestino sa kadalanan ug mga polis labing gikinahanglan.
Matud niya nga ang idestino nga mga polis nga gipadala gikan sa ubang rehiyon dinhi sa Sugbo kinahanglan usab nga mopakita sa ilang trabaho ug dili kay magbarogbarog sa dapit nga gidestinohan.