Ginang midunggab sa kapuyo kay 'nagselos'

Usa ka ginang ang gidudahan nga miunay og dunggab sa iyang kapuyo tungod sa selos apan nanudlo kini og laing tawo. Insidente nahitabo niadtong Martes sa gabii diha sa Barangay Camp II, Jaclupan dakbayan sa Talisay.

Gideklarar sa doktor nga patay na nga naabot sa Talisay District Hospital si Antonio Ligaray, 56, residente sa nahisgutang lugar. Kini nakaangkon og usa ka samad dinunggaban sa walang bahin sa iyang dughan ug gituohan nga maoy hinungdan sa iyang kamatayon.

Si Panchita Labajo, kapuyo ni Ligaray, mitumbok ni Jomil Briones, 24, residente usab sa lugar, security guard ubos sa Assault Security Agency ug nadestino diha sa MCWD project sa Jaclupan.

Base sa imbestigasyon ni PO1 Randy Balansag, si Ligaray uban nila ni Panchita, Briones ug sa duha ka silingan nga giilang Jeffrey ug Nitoy nga nag-inom diha sa balay sa biktima.

Nananghid si Panchita nga mobiya aron moduwa og baraha apan mga 10 metros palang ang gilay-on sa iyang pagbiya aduna siya'y nabating motorsiklo nga nagdaling mipalayo sa lugar.

Daling mibalik si Panchita sa ilang balay ug nakita niya si Ligaray nga adunay samad dinunggaban ug padulong na kining matumba.

Daling gidala ni Panchita si Ligaray diha sa nahisgutang tambalanan.

Usa si Glecerio Olita miangkon nga nadungog niya si Ligaray nga nagkanayon " kung ako ang mangabit kanang batan-on".

Si Briones nagkanayon sa pakighinabi usab niini sa Banat News nga nahibulong na lang siya nga gikuha siya ni Kapitan Placido Labajo atol nga nag-duty kagahapon sa buntag tungod kay suspetsado siya sa pagpatay.

Si Briones ug Olita mibutyag usab nga upat na ka tuig ang milabay, si Panchita napriso diha sa Talisay Detention Cell tungod sa pagpanukmag niini sa ilang silingan.

Ang biktima ni Panchita giila nga si Boy Fuentes kinsa nabuak ang ilong tungod kay maoy naigo sa pagsukmag.

Si Briones ug Olita mihulagway ni Panchita nga medyo may pagkalakin-on.

Si Balansag midungag nga nagkagubot ang mga gamit sulod sa balay ni Panchita ug Ligaray.

Si Panchita adunay samad sa tuong bahin sa ngabil niini usa sa posibleng timailhan nga ang biktima ug ang kapuyo niini nag-away sa wala pa mahitabo ang pagpanunggab.