Mga balay sa sapa pugson pahawa

Pugson sa kagamhanan sa dakbayan sa Sugbo ang pagpapahawa sa tanang mga pamilya nga gikonsiderar nga nahimutang sa critical area kun anaa magpuyo daplin sapa nga peligro sa trahedya sama sa baha kun motumaw ang kusog nga pag-ulan-ulan dinhi sa dakbayan.

Subay sa rekomendasyon sa Cebu City Disaster Coordinating Council (CCDCC) pinangulohan ni Konsehal Gerardo Carillo miabot og sobra sa dos mil ka mga pamilya ang nagtukod og mga ilegal nga estraktura nga maoy ilang gipuy-an daplin sa kasapaan dinhi sa dakbayan.

Ang CCDCC mirekomendar ngadto kang Mayor Tomas Osmeña og dinaliang demolisyon batok ning maong mga pamilya gumikan kay nahimutang sa peligro ang kinabuhi niini sama sa nahitabo didto sa Sindulan, Mabolo nga unom ka sakop sa pamilyang Balagapo ang namatay human gilunopan sa baha ang ilang gipuy-ang panimalay.

Giklaro ni Osmeña nga obligado nga papahawaon gyud ang maong mga pamilya nga nahimutang sa gikonsiderar nga kritikal nga lugar bisan pa man og wala pay klarong relocation site nga mahatag ang siyudad.

Gipasabot sa mayor nga kun sundon ang balaod ilegal ang pagpuyo sa maong mga pamilya diha sa maong lugar.

Base sa rekord sa Department for the Welfare of the Urban Poor (DWUP) miabot og kapin sa singko mil ang tanang pamilya nga anaa magpuyo daplin sa sapa ug ang mga nahimutang sa 3-meter easement gikan sa sapa.