Desisyon vs Ocampo wa makatagbaw

Wala matagbaw si Cebu City Mayor Tomas Osmeña sa nakab-ot nga desisyon sa korte pagkonbikto ni SPO1 Marcial Ocampo ang gitumbok nga mipusil patay kang Bantay Dagat Project Director Elpedio "Jojo" dela Victoria Jr.

Kini tungod kay hangtud karon nagpabilin pang gawasnon ang mastermind sa pagpapatay kang dela Victoria.

Gani gihisgutan sa mayor ang P1 milyon nga gisaad niyang ganti ngadto sa makatudlo ug makasikop sa utok sa krimen nga gihulagway niya nga usa ka adunahan ug impluwensyadong pagkatawo.

Wala na mohatag pa og dugang komentaryo si Osmeña batok sa gitumbok niyang mastermind sa pagpapatay kang dela Victoria gumikan kay gawas nga wala siyay nakitang kalamboan sa imbestigasyon sa kapolisan sa maong kaso,wala usab siyay lig-ong ebidensya batok niini.

Si Osmeña mitanyag sa P1milyon nga ganti aron unta maningkamot og maayo ang kapolisan ug madasig usab paghatag og impormasyon ang si bisan kinsa nga dunay igong kasayuran batok sa mastermind sa krimen.

Gihangop hinuon sa mayor ang gipakanaog nga desisyon ni RTC judge Ireneo Lee Gako Jr. nga nagkonbikto kang SPO1 Ocampo ug nagpahamtang sa silot nga 20 ngadto sa 40 ka tuig nga pagkabilanggo bisan pa man sa pagpangugat sa depensa nga 'frame up' lang ang akusasyon batok kang SPO1 Ocampo.

Ang pagka-aktibo ni dela Victoria sa kampanya batok sa mga illegal nga panagat maoy usa sa gitumbok nga hinungdan sa motibo sa pagpapatay kaniya.