Giangkon sa mayor nga magpabiling dili masumpo ang subling pagsiaw sa mga ginagmay'ng krimen dinhi sa dakbayan kun pasagdan nga dili mokooperar ang mga molupyo dinhi sa dakbayan.
Gihimong basehanan sa mayor sa pagpalapad sa Oplan Pakigsandurot mao ang gihimong panaghiusa sa walo ka mga barangay sa amihanang bahin nga epektibong mibungkag sa transaksiyon sa pagpayuhot og gidiling drugas diha sa bukirang barangay sa Pulangbato.
Giawhag sa mayor ang ubang mga barangay dinhi sa dakbayan nga maghiusa og sundon ang gihimo sa mga barangay sa Talamban, San Jose, Bacayan, Binaliw, Budlaan, Pulangbatu ug Pit-os nga epektibong misumpo sa ilegal nga drugas sa ilang lugar.
Isunod nga tukoron sa mayor mao ang networking sa kabarangayan nga pagatawgon unya kini og Neighborhood Association diin ang tanang mga kawani sa gobyerno organisahon aron pagpalig-on sa kampanya batok sa bisan unsang matang sa krimen.
Gipahibalo ni Osmeña nga sa pagkakaron pormal nang gipatuman sa siyudad ang Mars system nga mao ang pag-establisar og alarm system sa mga bangko ug lugar nga peligro sa tulis aron automatic kining marehistro sa kapolisan kun dunay motumaw nga alarma sa pagpanulis.