Babaye gilabay sa Lawaan I

Usa ka wala mailhing babaye nga gihigtan og pisi sa liog napalgang patay na kagahapon sa kaadlawon sa mga residente sa Lawaan I, Talisay.

Ang nahisgutang biktima nagbuy-od sa kasagbutang bahin sa maong lugar gibanabana nga nagpanuigon sa 30 ngadto sa 40, nagsul-ob og maong nga karsones ug puti nga t-shirt nga adunay markang "siemens", upat ka tiil ang gitas-on, gamay og lawas ug kasarangan ang pamanit niini.

Base sa imbestigasyon sa kapolisan sa Talisay nga ang mga residente sa lugar adunay nakitang duha ka lalaki nga sakay og motorsiklo nga daling mibiya sa nahimutangan sa biktima.

Si kapitan Ronald Lastimosa sa Lawaan I mitataw nga dili residente sa lugar ang biktima.

Gibutyag ni Lastimosa kagahapon sa Banat News nga ang biktima gipatung-an kini sa maong mga lalaki dayon gilabay sa lugar. Wala makuha sa mga saksi ang numero sa plaka sa nahisgutang motorsiklo tungod kay ngitngit pa ang palibot.

Ang nylon nga pisi gibaligtos ka unom sa liog sa biktima nga maoy gituohan sa kamatayon niini.

Ang kapitan midungag nga walay mga bun-og ang maong patay'ng lawas timailhan nga gikulata kini una gipatay.

Ang mga otoridad walay nakuhang mga identification sa maong babaye aron mailhan kini ug ang nahisgutang patay'ng lawas gidala sa Cebu Memorial Funeral Homes alang sa autopsy.

Ang kapolisan sa siyudad nagpahigayon og follow-up nga imbestigasyon sa maong hitabo.