Beat reporters sa Cebu nagkat-on og self-defense

Mga sakop sa Cebu Federation of Beat Journalists (CFBJ) gitudloan ug gipakitaan sa pamaagi sa pagdepensa sa ilang kaugalingon batok sa mga tulisan ug mga tawong dunay dautang tuyo sa ilang kinabuhi.

Ang pagtudlo gibahin sa duha ka opsyon, ang opsyon mao kung duna pay kaikyasan nga malikay sa pakigharong ug ang ikaduha mao ang opsyon nga kinahanglanon na atubangon ang hulga.

Ang nag-unang opsyon gitudlo ni Philippine Amateur Judo Federation-Central Visayas director, kinsa mao usab ang Managing Editor sa The Freeman, Nimrod Quiñones nga nakadawat sa iyang ika-Third Dan gikan ni 12th Dan Kodokan Judo Grand Master Philip Porter niadtong Pebrero ning tuiga.

Matud pang Quiñones mas importanteng makahibalo kung kanus-a angayang moikyas ug kung unsaon pagbuhat niini. Dugang pa niya kung wala kinahanglana ang pagpakigharong nga magbutang hinuon sa kinabuhi sa peligro dili kini buhaton.

"The best martial arts is to run, there is no need of putting yourself in danger," asoy pa niini.

Lakip sa gitudlo ni Quiñones mao ang mga "vital points" diin matawag nga huyang ang si bisan kinsang tawo kung maigo kini. Usa sa iyang gi-demonstrate mao ang pagpatid sa tuhod, paglingkawas gikan sa pag-agbay sa suspek ug ang pagdagan.

Samtang ang ikaduhang opsyon gitudlo ni John Rey Saavedra, ang Associate Editor sa Banat News ug chief instructor sa Daito Ryu Aiki Jujutsa Kogyokan Dojo ilawom sa pagdumala sa Fujiyama Dojo sa Ontario, Canada ug Pari Nippon Daito Ryu Aiki Bujutsu Rengokai sa Japan.

Ang Daito Ryu Aiki Jujutsu usa ka karaang military art sa Japan sa panahon pa sa Feudal System diin gigamit sa kasagarang pamilyang Samurai sa pakiggubat.

Gitudlo kung unsaon ang pagkalma atubangan sa peligro, pag-ilog sa kutsilyo atol sa pagdunggab, pag-hostage, pagtuok nga dunay kutsilyo ug ingon man ang paggamit sa ordinaryong butang sama sa ballpen batok sa armadong tawo.

Dugang pa niini mao ang pagpahinumdom sa mga sakop sa media sa pagtimbang-timbang sa sitwasyon kung ikabaylo ba nila ang ilang kinabuhi sa butang nga buot kuhaon sa mga tulisan ug uban pang dautang katuyoan sa miatake kanila.