Loot modestino'g secret marshals sa bus

Gipahibalo sa direktor sa kapolisan sa Cebu Provincial Police Office nga adunay mga secret marshals nga iyang pasakyon sa mga public utility bus ug mga pasaheroang multicab nga magbiyahian sa habagatan ug amihanan sa lalawigan sa Sugbo aron maoy mosumpo sa sunodsunod nga pagpanulis sa mga pasahero.

Si Sr. Supt. Vicente Loot sa pakighinabi sa mga tigbalita kagahapon miingon nga iya usab himuon human ang direktor sa Police Regional Office (PRO 7) Chief Supt. Silverio Alarcio Jr. direktang mimando kaniya.

Mao kini ang nakit-ang solusyon sa mga opisyal dinhi sa Central Visayas human sa kamatayon ni Carmela Cabañog, 19, dalaga, tinun-an sa UC kinsa gitulis ug gipatay niadtong milabay'ng Miyerkules sa gabii sa dalan Tagonol, Cogon.

Sa sayo pa si Alarcio nanawagan sa katawhan nga kinahanglan dili nila ibaylo ang kinabuhi sa usa lang ka butang.

Niadtong Biyernes sa hapon usa ka tulisan ang nadakpan human mitulis sa tinun-an samtang nagsakay og PUJ didto sa Minglanilla.

Si Leonardo Paraiso, 26, nga taga Tubod, Minglanilla nadakpan kay human sa iyang pagpanulis nanunggab og pasahero sa minibus.

Matud ni Loot nga iya nang gisugdan ang pagpili sa mga secret marshals kadtong polis nga dunay kasinatian sa martial arts ug hanas usab mogamit ug mohupot sa armas.

Dugang pang Loot iyang pilion ang mga polis nga angay ibutang sa marshals kay ang mga tulisan pulos armado og armas.

Matud niya nga duha ka polis ang magsakay gikan sa Consolacion paingon Danao ug Talisay City ug paingon usab sa Carcar.

Apan wala ikabutyag ni Loot ang detalye kun kanus-a kini magsugod kay matud niya aron dili makabantay ang tulisan.