Marshalls sa PUJ, Ok

Pagbutang og sekret marshall sa mga PUJ dinhi sa siyudad sa Sugbo gi-uyonan sa Nagkahiusang Drayber sa Sugbo aron palapdan ang maong kampanya kalabot sa pagsugpo sa tulis.

Si Tony Pogado, presidente sa Nagkahiusang Drayber sa Sugbo nga gikahinabi sa Banat News mipahayag nga wala siya mosupak sa plano ni Supt. Alarcio kalabot sa pag-deploy ug sekret marshal sa mga jeepney.

Gani iyang giklaro nga dugay na kini nga proposal nga gihimo sa kadagkuan sa PNP, ug niadtong tuig 2003 pa kini nga planoha sa dihang miuso usab ang pagpanulis sa mga PUJ.

Si Pogado mipasabot nga andam sila makig-alayon sa PNP sa pagsugpo sa maong krimen aron usab ang mga pasahero naa'y kasiguruhan nga luwas sila sulod sa PUJ kon sila mopauli o mogikan sa trabaho.

Midugang siya nga kinahanglan dunay panagtigom nga pagahimoon ang PNP tali sa Transport groups ug sa LTFRB kalabot sa maong plano aron usab matagaan sila og ideya kon unsa ilang pagabuhaton kon naa'y mahitabo nga tulis

Kon kahinumduman usa ka estudyante sa University of Cebu ang gipusil patay sulod sa PUJ nga may rota nga Basak- Pardo sa usa ka nag-inusarang tulisan human ang dalaga nagdumili sa paghatag sa iyang bag ngadto sa suspetsado.

Tungod sa maong insidente si Supt. Silverio Alarcio, director of the Police Regional Office - 7 midirekta ngadto sa mga provincial directors sa pag-deploy ug mga sekret marshal sa mga jeepney aron sa pagsugpo sa krimen nga mahitabo sulod sa usa ka Public Utility Jeepney.