Duha pari gihika og pangawat ug hulga

Duha ka pari sa Simbahan ni Teodorico, Inc., ug laing upat ang gipasakaan og kasong qualified theft ug grave threats sa ilang mga miyembro tungod sa paghulgang "mapikas ang Sugbo" niadtong Marso 13, 2006.

Sila si Padre Noel Raganas ug Padre Uldarico Andcog, ug mga sakop nga sila si Mario Casane,Camilo Baricuatro, Lilia Baricuatro ug Loida Baricuatro pulos taga Rowena Village, Lauis, Inabanga Bohol maoy gikiha.

Ang mireklamo mao si Elsa Suarez-Bagaman tungod sa pagdala sa mga suspek sa imahen sa ilang founder nga si Teodorico Melecio nga nagkantidad og P10 mil, usa ka typewriter P5 mil ug mga ekipo sa buhatan sa maong simbahan nga mikabat sa P10 mil niadtong Marso 10 ning tuiga gikan sa Guadalupe Heights, sa barangay Guadalupe ning dakbayan.

Sila si Robert Noval, Delbert Ray Bagaman ug Alejandrino Suarez igsoon ni Elsa maoy saksi sa paghakot sa mga suspek sa mga butang ni Elsa tungod kay tulo nalang ka adlaw gikatahong mapikas na ang Sugbo.

Si Elsa kinsa Bise-presidente sa grupo wala makapakgang sa mga suspek dihang namakwit ug gidala ang iyang kabtangan niadtong bulana tungod kay siya nagmasakiton.

Siya maoy tag-iya sa lote nga gitukoran sa kapilya nga simbahan sa grupo nga mao usab ang gihimong headquarters sa maong simbahan ug maoy namalit sa nangawalang ekipo.

Sagad sa mga miyembro naggikan sa Bohol anha temporaryong mopuyo sa balay ni Elsa kung moanhi sa Cebu.

Gikatahong gihadlok sa mga suspek ang ilang mga miyembro nga mapikas ang Sugbo tungod sa moigong dakong lunop ug ang lugar ni Elsa mahimong baybayon.

Ang maong panagna nakalisang sa mga miyembro sanglit gikatahong gikan kini sa ilang Santo Papa nga anak ni Teodorico Melecio nga si Romeo Melecio.

Si Melecio namatay niadtong Oktobre 2002 sa tambalanan sa dakbayan sa Tagbilaran.

Samtang si Suarez nagkanayon nga sukad namatay si Melecio mibiya na siya sa grupo apan ang iyang igsoon nga si Elsa nagpabilin tungod kay aduna man kini katungdanang gihuptan.

Matud ni Suarez nga 20 ka miyembro ang mibiya lakip na ang mga akusado dinhi sa Sugbo tungod sa maong panagna apan gidala ang nahisgutang mga butang nga walay pananghid sa iyang igsoon.