Psychological test para sa aplikante pagka-titser

Ang mga kadagkoan sa edukasyon mipasidaan nga kadtong mga magtutudlo nga may "deperensya" ang pangutok way luna sa pagpanudlo ilabi na sa mga eskuylahan sa gobiyerno.

Si Regional Director Carolino Mordeno miluwat ning maong pasidaan aron kadtong mga nanagtungha sa kursong pagkamagtutudlo makapangandam aron pag-usab sa ilang kinaiya samtang nagtungha pa sila.

Miingon si Mordeno nga ang Department of Education (DepEd) estrikto kaayo sa paghatag og eksamin nga gitawag og "psychological test" ST niadtong mga aplikante sa pagkamagtutudlo.

Gani may duha na ka tuig nga giimplementar kining maong balaod sa tinguha sa gobiyerno nga kutob sa bag-ong hut-ong sa mga magtutudlo, wala nay manaogdaog og mga kabataan diha sa eskuylahan.

Matud pa ni Mordeno nga nakahukom ang kadagkoan sa edukasyon pagpatuman ning ST tungod sa daghang mga kasinatian nila nga may mga estudyante gyung nangamatay gumikan sa ka-dili tawhanong kinaiya sa magtutudlo.

Ang ST magtumbok sa kinaiya sa usa ka tawo kon mahigugmaon ba o dili sa mga bata, mapailobon ba o dili, mosakripisyo ba o dili, ug uban pang matang sa kinaiya nga magsukod sa iyang kaugalingon kon unsa ang matang sa iyang pagkatawo, matud pa ni Mordeno.

Ang maong balaod gihatagan usab og bag-ong gibug-aton karon ni Kalihim Jesli Lapus tungod kay daan na niyang nasinatian ang suliran bahin sa pangabuso sa ubang mga magtutudlo ngadto sa mga kabataang ilang gitudloan sa eskuylahan.

Ang maong pangabuso naglakip sa pagpamun-og, pagsulti og sakit kaayo batok sa mga batang magpabadlong ug uban pang kinaiya nga magmatuod nga ang usa ka magtutudlo dili pasinsyoso busa dili angayang magpabilin sa pagkamagtutudlo.