'Bodyguard' ni Leyson nakuhaag armas 'tanggong

Nangangkong bodyguard ni konsehal Gabriel Leyson ang nasignit sa mga opisyal sa Barangay Lawaan I dakbayan sa Talisay niadtong Biyernes sa gabii.

Nagtingkagol diha sa Talisay detention cell si Jeffrey Sico, taga Canhulao dakbayan sa Lapu-Lapu kinsa nasakmitan og usa ka 9mm nga pistola nga adunay 20 ka buhing bala sa magazine niini.

Si Sico uban ni Simeon Franklin Andan Jr. niadtong higayuna apan si Andan gibuhian sa mga polis.

Si SPO1 Noel Factores, desk officer sa Talisay police station mibutyag kagahapon sa Banat News nga si Sico ug Andan mipakita og dokumento nga nagpamatuod nga mga sakop sila sa Barangay Intelligence Network (BIN) dihang gisita kini nila ni Ronald Lastimosa ang Barangay kapitan sa Lawaan 1 ug sa iyang konsehal nga si Joy Tumulak tungod sa pagdala-dala og pusil sa suspetsado.

Si Sico miangkon nga body guard sila ni Leyson kagahapon sa udto dihang gipangutana kini ni PO1 Gabriel Opoc, polis sa Talisay.

Ang Banat News napakyas og kuha og pamahayag ni Leyson tungod kay walay motubag sa telepono niini dihang gitawagan kini.

Kahinumduman nga si Leyson mikompirma nga modagan isip mayor sa dakbayan sa Talisay atbang ni Mayor Socrates Fernandez karong moabot eleksiyon sa 2007.