Problema sa baha maoy unahon

Ang kaluwasan sa kabus nga mga lumolupyo maoy hatagan og pasiunang pagtagad ni Mayor Thadeo Ouano ug dili kini managana sa pagpaguba sa mga kanal nga maoy makaingon sa paglunop sa tubig ug pagbaha niini.

Sa pagpakighinabi sa Banat News kang Mayor Ouano maoy iyang gipadayag nga dili niya igsapayan nga mag-atubang og kaso kon bugti niini ang kaluwasan sa mga tawo.

Sa nasayran sa Banat News nga usa ka George Ybanez sa dalan A.S Fortuna sa sitio Orel sa Banilad, dakbayan sa Mandaue ang midangop sa pagpangayog panabang kang Ouano tungod sa baha sa ilang lugar sa panahon sa kusog nga ulan.

Gipadad-an gilayon ni Ouano og mga sakop sa city engineer ug gipasusi ang nakaingon sa pagbara sa kanal niini.

Matud pang Ouano maoy iyang gipadayag ang pagkabara sa kanal nga gikan sa koral nga semento sa J King and sons.

Si Ouano ug uban pang mga opisyal sa dakbayan ang gipasakaan og kaso sa J King and Sons tungod sa gihimong paghawan sa kanal nga naalihan sa gitukod niining bodega sa barangay Cambaro nga nakaingon sa pagreklamo sa mga lumolupyo.

Napakyas hinuon ang J King nga kumpanya sa ilang gipangayong temporary restraining order atol sa hearing nga gihimo sa korte gawas lamang sa pagsabot-sabot.