Taxi nga mogamit og LPG "ipahunong"

Gitinguha karon ang pagpahunong sa operasyon sa mga taksi yunit nga naggamit og Liquefied Petroleum Gas (LPG) samtang gihimo pa ang mga lagda alang sa paggamit niini.

Ang pagpahunong sa operasyon sa mga taksi yunit ang matigayon kon kauyonan sa mayoriyang sakop sa hunta probinsiyal sa Sugbo ang resolusyon nga sa chairman sa committee on energy nga si Provincial Board Member Victor Maambong.

Sa resolusyon ni Maambong nga iyang gikatakdang iduso sa ilang regular session nga pagahimoon karong Lunes ang gitumong alang sa paglikay sa aksidente nga sama sa nasinati sa Gene's Laundry Shop sa dakbayan sa Mandaue.

"It may bode well to the public to suspend the operation of LPG-Powered taxi cabs until after the Department of Energy shall come up a guideline," nagkanayon si Maambong sa iyang resolusyon.

Si Engineer Antonio Labios, director sa DoE dinhi sa Rehiyon 7 nga gikahinabi sa Banat News miingon niadtong pang 1980's nga gisugdan sa paggamit sa taksi ang LPG.

Gitug-an niya nga mga 200 lamang hinuon ang gidaghanon sa mga taksi nga naggamit niini sa maong tuig apan kapin na kini sa usa ka libo niining panahona.

Gipaabot ni Director Labios nga nagkadaghan ang mga transport company sa taksi nga misagop sa paggamit sa LPG tungod usab sa padayong pag-usbaw sa presyo sa produktong petrolyo.

Giklaro niya nga ang ulohan nilang buhatan sa DoE wala pay "guidelines" sa mga taksi yunit nga naggamit og LPG ug ang ilang buhatan sa rehiyon ang igo lamang tahasan sa pagpatuman niini.