Gipusil sa ulo ang habal driver

Nabungkag ang nagtapok nga mga tawo sa disco sa miaging gabii sa sitio Manghilaw sa barangay Masaba, dakbayan sa Danao human ang usa ka habal-habal drayber ang kalit gipusil sa ulo.

Ang biktima mao si Joebert Mosa, 30 anyos, ulitawo nga nagpuyo sa maong dapit kinsa gipusil sa wala hiilhing lalaki sa wala matino nga kalibre sa armas.

Si SPO1 Jose Relampagos sa kapolisan sa nahisgotang dakbayan nga gikahinabi sa Banat News miingon nga ang gipahigayon nga disco sa mga lumolupyo may nagsaulog sa tinuig nga pangilin sa maong dapit.

Nagdinaganay ang mga tawo nga nakalitan sa maong pagboto sa armas ug ang biktima nga nakamatikod nga nagkadugo na ang ulo ang nakasinggit pa sa pagpangayog panabang.

Si SPO1 Relampagos miingon nga dali nga gidala ang biktima sa Danao District Hospital apan sanglit kritikal ang kahimtang gibalhin kini sa Vicente Sotto Memorial Medical Center sa dakbayan sa Sugbo.