Rapist sa bata sikop

Nadakpan sa gipahigayong hot pursuit operation sa kapolisan ang usa ka lalaki nga gipasanginlang milugos sa 6 anyos nga batang babaye niadtong milabay'ng Martes sa gabii.

Segun sa report nga midangat sa Provincial Police ang menor de edad human siya lugosa misumbong ngadto sa iyang silingan lalaki.

Usa ka Hector Tenolete, hingkod, silingan sa biktima maoy mituyo og adto sa kapolisan human miasoy kaniya ang biktima nga miresulta sa pagkasikop sa suspetsadong giila sa kapolisan nga si William Gonzales, ulitawo, lumad nga taga Bitoon Dumanjug og kasamtangan nagpuyo sa Tulay, Minglanilla.

Si Gonzales nagtrabaho sa Pepsi Cola Bottling Corporation sa nahisgutang lungsod.

Ang nangulo sa hot pursuit operation mao si SPO1 Romeo Dia Barde uban sa laing tulo ka Police Non Commission Officer (PNCO)

Nasayran ang menor de edad miasoy sa womens desk sa Minglanilla niadtong Lunes sa gabii nga didto siya lugosa sa suspetsado sa baybayon sa Tulay ug positibo niining giila si Gonzales.

Ang menor de edad gi-turn over na sa Department of Social Welfare and Development (DSWD).

Samtang si Gonzales gitanggong karon sa detention cell ug kagahapong adlawa pormal nang gipasakaan og kasong pagpanglugos sa piskaliya.