Clean-up drive nasab sa Sugbo

Giawhag ang tanang mga molupyo apil na ang pribadong sektor nga motabang sa laing hugna nga pagahimuon alang sa hiniusang pagpanglimpyo sa mga basura nga gipataka og labay sa mga kasapaan dinhi sa dakbayan sa Sugbo.

Mao kini hagit ni Bise Mayor Michael Rama, tsirman sa Coastal Management Board (CMB) atol sa press conference kagahapong adlawa nga gitumong aron pangandaman ang ika-upat nga hugna sa clean up drive karong Sabado.

Apil sa nitambong kagahapon mao ang mga kapitan gikan sa lain laing mga barangay sa coastal areas nga maoy sentro sa gitakdang limpyohan ug ingon man ang mga Non Government Organizations (NGO).

Ang tema sa maong pagpanglimpyo karong tuiga gitawag og "Paglimpyo para sa himsog nga kalawasan",aron pagdasig sa mga batan-on nga mosunod sa angay himoon aron manumbalik ang limpyong palibot sa dakbayan.

Ang unang clean up drive gilusad niadtong bulan sa Disyembre sa milabay'ng tuig, ning bulan sa Marso ug ang ikatulo sa milabay'ng Hunyo.

Nagtuo si Bise Mayor Rama nga kon wala pa kasugdi ang maong hiniusang pagpanglimpyo posibling dili lang kay unom ka tawo nakalas sa baha sa mga milabay'ng pagbunok sa ulan dinhi sa dakbayan.

Apil sa gi-awhag kadtong mga pamilya nagpuyo daplin sa sapa nga maoy piligro sa baha panahon sa ting-ulan sa pagsanong sa maong kalihukan.