Papa mi-rape sa anak gikonbikto

Usa ka amahan kinsa miunay paglugos sa iyang anak gikonbikto sa duha ka kasong rape ug gihukmang mabilanggo sa tibuok niyang kinabuhi ni Regional Trial Court Branch 14 Judge Raphael Yrastorza Sr.

Gawas sa maong silot, si Reman Sariego pabayron usab og P125 mil nga civil liability ug moral damages sa biktima.

Ang biktima nagpanuigon pa lang og 17 dihang nahitabo ang nahisgutang insidente.



Niadtong Disyembre, 2000 diha sa sulod sa balay sa pamilyang Sariego niining dakbayan nahitabo ang unang pagpanglugos ug ang maong insidente nasundan niadtong Pebrero 2001.

Atolon og among-among ni Sariego ang iyang anak kung wala diha sa ilang balay ang iyang asawa tungod kay maninda kini diha sa Carbon.

Ang biktima nahadlok nga mosumbong sa iyang inahan kabahin sa maong insidente tungod kay hulgaon kini ni Sariego nga patyon lakip na ang inahan niini.

Ang biktima mitug-an sa iyang inahan nga mabdos siya ug napamatud-an kini base sa resulta sa ultrasound.

Si Sariego mipasangil nga ang uyab sa biktima maoy nakapamabdos niini.

Ang pamahayag sa biktima ngadto sa korte gihatagan og gibug-aton tungod kay walay rason nga mosulti kini og bakak batok sa iyang amahan nga makadaot sa iyang reputasyon ug kaugmaon.