Killer ni Allan gi-abswelto sa kaso sa drugas

Mamumuno ni kanhi The Freeman ug Banat News photographer Allan Dizon ug laing duha gi-abswelto ni Judge Gabriel Ingles sa Regional Trial Court Branch 58 sa kasong kalapasan sa Akta Republika 9165 kun Comprehensive Dangerous Drugs Act.

Si Edgar Belandres, 41, taga Sityo Itom Yuta, Lorega San Miguel nahukman sa korte sa silot kamatayon human kini mapamatud-i nga maoy mipatay ni Dizon niadtong Nobiyembre 2004.

Niadtong Disyembre 2004, si Belandres gisikop sa grupo sa Criminal Investigation and Detection Group (CIDG) diin ang maong mga polis wala magdala og warrant of arrest batok ni Belandres tungod sa ilang gipahigayong hot pursuit kabahin sa pagpatay ni Dizon kinsa ang akusado maoy suspek.

Sa gipahigayong pagpangronda diha sa bunk house nga gipanag-iya sa pamilya ni Belandres, ang mga polis mipasangil nga ang akusado uban nila ni Mariano Villarin ug Gaudencio Perales nag-pot session.

Gibiyaan nila ni Belandres, Villarin ug Perales ang shabu paraphernalia ug usa ka plastic nga dunay traces sa shabu ug nanglayat kini sa bintana sa pag-abot sa mga polis. Apan ang maong mga pasangil gihimakak sa tulo.

Matud sa mga akusado nga ang ebidensiya nakita na lang niya kini dihang gipresentar na sa korte.

Si Perales nagkanayon nga sa gipahigayong pagpangronda sa sakop sa CIDG wala kini kuyog nga opisyal sa barangay ug wala gani litrato nga nakuha sa mga ebedinsiya.

Ang prosekusyon napakyas pagmatuod nga dunay nahimong kalapasan ang mga akusado hinungdan nga ang tulo naabswelto.

Si Ingles nagkanayon nga ang pagsikop sa mga akusado nga walay warrant usa ka kalapasan ug dili matawag nga balido ang pagpahigayon og ronda ug ang mga ebidensiya nga nasakmit dili pweding magamit batok sa mga akusado.