P3.2M plastic resins gisakmit sa BOC

Mga P3.2 milyones nga kantidad sa mga imported nga plastic resins nasakmit sa mga sakop sa Bureau of Customs sa Sugbo ug pormal nga giablihan kagahapon sa buntag didto sa Cebu International Port.

Atol sa maong pag-abli sa tulo ka mga 20-footer container vans personal nga gisusi ni Cebu Customs District Collector Recardo Belmonte ang tulo ka containers ug nasuta kini nga mga imported nga plastic resins apan dili mao ang deklarasyon niini.

Matud pa ni Belmonte miabot ang tulo ka mga vans niadtong Septiyembre 4 gikan sa nasud sa Singapore luwan sa M/V Elena ug kini gideklarar nga industrial shortening ug ang consignee niini mao ang Himaya Marketing nga nagbase dinhi sa Sugbo.

Sumala sa report nga usa ka Deo Alberca ang broker sa maong kargamento.

Atol sa pag-abli sa mga vans nasuta nga moabot sa 2,040 ka sakong Marlex Brand polyethelene resins ang sulod sa tulo ka mga container vans nga motimbang sa 25 kilos matag usa ka sako, sukwahi sa deklarasyon nga industrial shortening, hinungdan nga kini gisakmit sa mga sakop sa BOC.

Matud pa ni Belmonte nga ang maong shipment nakalapas sa section 2530 (i) in relation to section 2503 sa Tariff and Customs Code of the Philippines.

Miluwat na og warrant of seizure and detention si Belmonte batok sa tulo ka container vans.

Gibanabana nga mokabat sa P3.2 milyones ang kantidad sa maong shipment diin anaa karon sa kustodiya sa Auction and Cargo Disposal Division sa adwana.