Ordinansahon ni Pesquera ok sa Nadsu

Miduso og position paper ang Nagkahiusang Drayber sa Sugbo (NADSU) ngadto sa konseho sa dakbayan sa Sugbo aron ipahibalo niini nga suportado nila ang giduso nga ordinansahon ni Konsehal Jocelyn "Joy" Pesquera.

Ang maong ordinansahon ni Pesquera nagtinguha kini sa pag-amendar sa City Ordinance (C.O.) 1320 (Travel Line sa mga PUJ) aron kahatagan og laing alternatibo nga rota ang mga PUJ sa Mandaue Jones nga rota (21B, 22B) nga makapadayon sa pagpamasahero dinhi sa dakbayan sa Sugbo.

Gibutyag ni Tony Pogado presidente sa NADSU nga nakauyon sila sa maong ordinansahon ni Pesquera nga gihulagway nilang maki-angayon ug walay gipaboran.

Padayong giinsister sa NADSU ang pagsupak sa gipamugos nga implementasyon sa siyudad sa City Ordinance 1837 nga nagdili sa mga PUJ gawas sa Sugbo sama sa Mandaue nga makalahos sa pagpamasahero dinhi sa dakbayan.

Gibutyag ni Pogado diha sa ilang suwat ngadto kang Konsehal Edgardo Labella nga daghan na sa ilang mga kaubang mga drayber ang naglisud sa adlaw-adlaw'ng panginahanglan sa ilang pamilya gumikan ning kanunay'ng pagpanakop sa Citom sa higayon nga mosulod sila sa Jones Avenue.

Gani gitug-an ni Pogado nga daghan nang mga anak sa ilang mga drayber ang na-undang sa pagtungha tungod sa nahasol nilang panginabuhi-an diha sa kadalanan.