Navy gisikop sa SWAT

Sakop sa Philippine Navy gisikop sa SWAT team human kini gikaalarma nga namusil og sibilyan didto sa Sitio African Daisy, Looc, Lapu-Lapu sa milabay'ng gabii.

Ang nasikop mao si Petty Officer 1 Nilo Ylaya Alegarbes, 50, minyo, nagpuyo sa maong dapit nga nadestino sa Central Command sa dakbayan sa Sugbo.

Base sa pasiunang imbestigasyon, usa ka Wendel Putot ang mitaho sa kapolisan ug miakusar kang Alegarbes nga namusil kanila samtang naglakaw kini padulong pauli sa ilang panimalay.

Atol sa pagresponde sa mga sakop sa SWAT team uban kang PO3 Roland Melior ilang naaktuhan si Alegarbes nga naghupot sa iyang kalibre .45 nga adunay tulo ka buhing bala ug usa ka kabhang hinungdan sa pagsikop niini ug gidala sa Lapu-Lapu Police Station.

Atol sa imbestigasyon hugot nga gitumbok ni Putot si Alegarbes nga maoy mipusil kaniya makaduha ka higayon apan suwerte nga wala kini makaigo.

Si PO1 Alegarbes sa pakighinabi sa Banat News hugot usab nga nanghimakak sa maong akusasyon nga siya namusil ni Putot.

Matud pa ni Alegarbes nga igo lamang siya miprotiher sa mga tawo nga nagkagubot human nga si Putot ug mga kauban niini katulo na nga misulong sa ilang dapit gumikan sa panagbingkil sa mga batan-on ug sa nag-ribal nga fraternity nga Alpha Kappa Rho ug Tau Gamma Phi.

Human naalarma ang katawhan sa ilang dapit sa presensiya ni Putot ug mga kaubanan dali siyang nanawag sa kapolisan sa dakbayan sa Lapu-Lapu ug sa Philippine Navy aron kapugngan ang kasamok.

Gumikan sa kalangay sa pagresponde sa mga polis napugos siya pagkuha sa iyang armas ug nagpasalba niini aron mahunong ang kagubot.

Gihimakak usab ni Alegarbes nga iyang gipunting ang armas sa mga batan-on kun dili igo lamang siya nagpasalba. Gani personal siya nga misurender sa mga sakop sa SWAT team.

Si PO1 Alegarbes anaa karon padayong gidetiner sa Lapu-Lapu Police Station ug pasakaan kini og kasong attempted homicide ngadto sa piskaliya.