Tinun-an patay sa frat war

Patay ang usa ka graduating sa kursong Computer Science samtang naangol usab ang duha ka mga tinun-ang gikatahong mga sakop sa Alpha Kappa Rho fraternity sa lain na usab nga kagubot sa mga fratman dinhi sa Sugbo niadtong milabay'ng gabii.

Ang namatay pila ka minutos human madangat sa usa ka pribadong tambalanan giilang si Lesley del Mundo Reroma, 27, minyo, tinun-an sa Cebu Institute of Technology ug residente sa Las Villas,Pardo ning dakbayan.

Samtang nangaangol usab ang iyang mga kaubang sila si Ruel Enos Guinita alyas Intsik, 22, tinun-an sa nursing sa samang tunghaan ug residente sa Cogon drive, Pardo ug Stephen Binondo Mabunay, 30, nga Tabucanal, Pardo.

Sumala pa sa kapolisan si Guinita sakop sa Akrho samtang gisusi pa usab ang report nga sakop usab sa Alpha Kappa Rho si Mabunay.

Duha ka wala mailhing mga lalaki ang gitumbok nga miatang sa mga biktima samtang sila padulong na pauli.

Sa imbestigasyon sa Homicide Section pinanguluhan ni SPO2 Rey Cuyos, gikan pa ang tulo sa balay sa usa ka Redentor Rojo ug mga kabanay sa naulahi nanag-inom diha sa dalan Tabura sa Poblacion-Pardo ning dakbayan.

Human sa panaglipay nagkuyog ang tulo nga namauli apan samtang mihunong sa paglakaw ug nag-estoryahay kalit nga miabot ang mga suspek nga armado ug walay daghang pasumangil mipusil kanilang tulo makadaghang higayon.

Ang tulo mitinguha og dagan apan pulos sila naigo ug si Reroma maoy nagrabehan tungod sa naangkong samad pinusilan diha sa iyang dughan, likod, walang bahin sa tiyan, diin dali kining gidala sa Chong Hua Hospital apan nakabsan kini sa iyang kinabuhi.

Samtang naigo usab si Guinita sa walang dughan ug walang bahin sa lawas, nakaangkon usab og samad pinusilan si walang tiil si Mabunay ug parehong nadala sa Cebu City Medical Center.

Human sa pagpamusil daling miikyas ang mga suspek diha sa dapit ug wala na igkita sa grupo nila ni PO2 Joel Lacson ug PO2 Jonathan dela Cerna sa Mobile Patrol Group.

Upat ka basiyo sa kalibre 45 nga bala ang napalgan ni PO1 Leopoldo Ballido sa Pardo Police station.

Gituohang may kalambigitan sa fraternity ang hinungdan sa pagpamusil.