2 kawani sa Talisay gi-ombud

Duha ka kawani sa Talisay City Civil Registrar kinsa gipasanginlang mga arogante gipasakaan og kasong administratiba ngadto sa Ombudsman niadtong Lunes ni kapitan Olga Fiel kapitan sa Barangay Tungkop, sa Minglanilla.

Ang mga gireklamo mao sila si Marian Joan Sadora, clerk sa window #2 ug Agnes Caparida, clerk sa window #3.

Si Fiel miawhag ni Deputy Ombudsman for the Visayas Virginia Palanca-Santiago nga mopahamtang og disciplinary action batok sa nahisgutang mga kawani.

Ang Kapitan mibutyag nga niadtong Lunes sa alas 2 sa hapon mikuha siya og dokumento diha sa maong buhatan diin adunay ipanghatag nga priority number alang sa mga kliyente.

Ang priority number ni Fiel numero 23, gitunol niya kini ni Caparida apan ang nahisgutang clerk misirado na sa iyang window ug misenyas ni Fiel nga mobalhin sa window #2 kinsa si Sadora maoy clerk.

Gipalingkod usa ni Sadora si Fiel ug mitawag kini sa sunod nga numero hinungdan nga mireklamo ang kapitan.

Si Fiel mipasangil nga aroganteng mitubag kaniya si Caparida sa iyang pagsita niini ug nagkanayon nga adunay depekto ang ilang numbering machine.

Matud ni Fiel nga nasagmuyo siya ug nainsulto tungod kay siya pa maoy gibasol ni Caparida sa maong sayop.

Si Caparida ug Sadora nagkinataw-anay ug naghunghunganay nga nakapahagit sa kapitan.

Si Gemma Ladion, civil registrar officer, nagkanayon nga pagkahibawo niya sa maong insidente iyang gipatawag si Fiel aron iyang paminawon ang reklamo niini apan ang kapitan misaka na sa taas paingon sa buhatan sa bise-mayor.

Gibutyag ni Ladion nga usahay makasinati ang ilang buhatan og mga reklamo gikan sa mga kliyente kabahin sa pagkalangan sa proseso sa mga gi-request nga dokumento apan ila kining pasabton nga dunay mga insidente nga mahitabo nga dili gyud mapugngan nga maoy hinungdan sa pagkalangan.

Matud ni Ladion nga human sa insidente nga nahitabo ni Fiel, andam gihapon ang ilang buhatan nga mohatag og serbisyo ngadto sa kapitan.

Gitataw ni Ladion nga ang ilang buhatan dili sangang buhatan sa National Statistics Office (NSO) nga maoy pagtuo ni Fiel.

Niadtong Pebrero niining tuiga, ang buhatan sa Civil Registrar sa Talisay nagsugod og pagpanawat og mga application para sa mga security papers aron matabangan ang NSO 7 nga maluag ang mga transaksyon sa maong buhatan.