Ordinansa sa price council gi-veto ni Tom

Laing ordinansa sa siyudad sa Sugbo nga na-aprobahan sa konseho gi-veto ni Mayor Tomas Osmeña gumikan kay alang sa mayor walay kapuslanan ug nag-usik usik lang sa oras ug panahon kun ikapatuman ang maong balaod dinhi sa dakbayan.

Kini mao ang ordinansa alang sa planong pagtukod og Local Price Monitoring Council nga gitumong aron estriktong mamonitor ang tanang mga katindahan ug kamerkadohan dinhi sa dakbayan aron masiguro nga insakto ang presyo sa mga baligya niining produkto.

Gipasabot ni Osmeña atol sa press conference kagahapon sa udto gikapoy na siya sa daghang mga komitiba nga gitukod sa konseho nga naka-apektar sa adlaw-adlaw'ng gimbuhaton sa mga department heads sa Cebu City Hall.

Tungod niini, moluwat og direktiba si Osmeña ngadto sa tanang mga department heads nga nagdili pagtambong sa bisan unsang mga meetings sa girepresentahan niining mga komitiba panahon sa oras tingtrabaho.

Mosugot lang ang mayor nga makatambong sa maong mga meetings ang mga department heads human sa oras tingtrabaho o sa pagka Biyernes sa hapon.

Nasayran nga sagad sa mga department heads membro kini sa mga lainlaing mga komitiba nga gi-umol sa konseho pinaagi sa pagpalabang og balaodnon.

Ang City Attorney's Office ug ang City Planning and Development Office maoy pipila lang sa daghang mga departamento sa city hall nga nahisakop og lainlaing komitiba.

Ang mga department heads nga motambong og mga meetings sa giapilan niining mga komitiba makadawat kini og dugang insentibo gawas sa ilang gidawat nga binulang suholan.