Pantalan andam na's ASEAN Summit- bag-ong CPA chief

Wala'y nakitang problema ang bag-ong manager sa Cebu Port Authority, Angelo Verdan, labot sa pagpangandam sa pantalan alang sa umaabot Asean Summit.

Matud pa ni Verdan nga ang gipatuman nga seguridad sa pantalan sa Sugbo sa pagkakaron, mao ra gihapon hangtud sa Asean Summit sanglit ang tanang delegado pulos man mag-eroplano.

Sumala pa ni Verdan nga may Asean Summit o wala, higpit ang gipatuman nga seguridad sa pantalan alang sa mga lokal nga biyahidor.

Gipasalamatan ni Verdan ang iyang nasundan nga si Mariano Martinez sa pagpahimutang og maayong terminal alang sa mga pasahero ug pagbutang sa mga baggage x-ray machines.

Giangkon ni Verdan nga kon daku pa kaayo ang papel sa pantalan atol sa Asean Summit, lisud gyud ang pagpatuman sa seguridad gumikan sa kadaghang abli nga agianan.

Matud pa ni Verdan nga lahi ra kaayo sa una niyang katungdanan isip general manager sa tugpahanan sa Mactan nga pila lang ka building ang atimanon.

Hinuon, masaligon si Verdan sa iyang katakus sa pagdumala sa tugpahanan sa Mactan nga iya usab kining magamit sa pantalan.

Gipasabot ni Verdan nga sa dihang gitudlo siya sa katungdanan, bugtong kamandoan ni Presidente Gloria Macapagal Arroyo kaniya mao ang pagpatunhay sa nautical highway.

Kabahin niini ang pagsusi ni Verdan sa kahimtang sa tanang pantalan sa tibouk lalawigan sa Sugbo nga ubos sa CPA.